యేసుతో ప్రతి ఉదయము:-

ఈరోజు దేవుని వాగ్దానము :-

యెహోవాయందు ఆనందించుట వలన మీరు బలమొందుదురు నెహెమ్యా 8:10

యెహోవాయందలి ఆనందమున-నూతన బలము

దేవుని సంతోషము ఆయన బిడ్డలందరికీ చెందవలసి ఉన్నది దిన దినము ఆయన వాక్యమును ఎందరైతే తమ హృదయములలో ప్రవేశింపనిచ్చి దానిని విశ్వాసముతో అంగీకరింతురు వారెల్లరు దేవుని ఆనందమును పొందగలరు 

నెహెమ్యా ఎనిమిదవ అధ్యాయంలోఇశ్రాయేలు ప్రజలందరూ 

• ఏక మనస్సుతోను
• ఏకతాత్పర్యముతోనూ 
• ఆ వాక్యమును నూతనముగా వినుటకై కూడుకొని ఉండిరి. 

దేవుని సేవకులు వాక్యమును బోధించుచుండగా వారి హృదయములో సంతోషభరితములాయెను. “వారికి బహు సంతోషము పుట్టెను”.

• మన మొండితనము
• బుద్ధిహీనతల చేత 
• మన గతించిన జీవితం 
• నిష్ఫలముగాను, 
• అపజయములతో కూడినది గాను ఉండవచ్చు. 

అయితే దేవుడు గడచిన మన బ్రతుకులను క్షమించి మనలను తిరిగి తన యొద్దకు రాబట్టుకొనుటకు మనకు నూతన ఆనందము- “యెహోవాయందలి ఆనందమును” అనుగ్రహించుటకు కూడా ఇచ్చుచున్నాడు ఆ  ఆనందము మన బలముగా ఉండవలెను. మనము ఆయన వైపు తిరిగిన క్షణమే ప్రారంభమై ఆయనతో మనము నడిచిన కొలది అడుగడుగు కు విస్తరించుచుండు  ఆనందం మది. 

 ఆత్మీయమైన చిన్న కధ:నిజమైన బలం 

ఒక ఊరిలో ఒక వ్యక్తి ఎప్పుడూ దిగులుగా ఉండేవాడు. తన గతకాలపు తప్పులు, అపజయాలు తలచుకొని కృంగిపోయేవాడు. ఒకరోజు అతను ఒక వృద్ధ దైవజనుడిని  కలిసి,”అయ్యా నా జీవితం అంత అపజయాలే, నాకు బలం కావాలి అని అడిగాడు. 

ఆ దైవజనుడు అతని చేతికి ఒక ఖాళీ గ్లాసు ఇచ్చి, దానిని పైకి పట్టుకోమన్నాడు. ఐదు నిమిషాల తర్వాత ఆ వ్యక్తి చేయి నొప్పి పుడుతోంది అన్నాడు. అప్పుడు దైవజనుడు ఇలా అన్నాడు: “నీ గతకాలపు బాధలు కూడా ఈ గ్లాసు లాంటివే. నువ్వు వాటిని ఎంతసేపు పట్టుకుని ఉంటే, అంత బలహీనపడతావు. వాటిని దేవుని పాదాల దగ్గర వదిలేసి, ఆయన ఇచ్చే క్షమాపణను బట్టి ‘సంతోషించడం’ మొదలుపెట్టు. నువ్వు సంతోషించినప్పుడే, నీ భారమంతా ఆయన మోస్తాడు. అప్పుడే నీకు నిజమైన బలము వస్తుంది.“

 గొప్ప దైవజనుల మాటలు

• సి.హెచ్. స్పర్జన్ (C.H. Spurgeon): “క్రైస్తవుని సంతోషం లోకసంబంధమైనది కాదు, అది పరలోక సంబంధమైనది. పరిస్థితులు మారవచ్చు, కానీ దేవుని యందలి ఆనందం మన ఆత్మకు కవచం వంటిది.”
• కోరీ టెన్ బూమ్ (Corrie ten Boom): “మీరు లోకాన్ని చూస్తే కలవరపడతారు, మిమ్మల్ని మీరు చూసుకుంటే కృంగిపోతారు, కానీ క్రీస్తు వైపు చూస్తే విశ్రాంతిని, సంతోషాన్ని పొందుతారు.”

ప్రార్థన:-

పరిశుద్ధుడైన తండ్రీ, ఈ ఉదయకాలము నీ వాగ్దానము ద్వారా మమ్మల్ని బలపరిచినందుకు వందనాలు. గడిచిన కాలంలో మా బుద్ధిహీనత వల్ల, అపజయాల వల్ల మేము కోల్పోయిన ఆనందాన్ని నేడు మాకు తిరిగి ప్రసాదించండి. “యెహోవాయందలి ఆనందమే మా బలము” అని మేము నమ్ముతున్నాము. మా గత పాపములను క్షమించి, నీ వాక్యము ద్వారా మా హృదయాలకు నూతన ఉత్సాహాన్ని దయచేయండి. ఈ రోజంతా నీ తోడ్పాటు మాకు అనుగ్రహించమని యేసు నామములో ప్రార్థిస్తున్నాము పరమ తండ్రీ, ఆమెన్.

“దుఃఖము రాత్రి కాలమున నిలుచును, ఉదయమున సంతోషము కలుగును.” (కీర్తన 30:5)

ONE YEAR BIBLE STUDY PLAN:-

నిర్గమకాండము 28-29 అధ్యాయములు